flood in koshi

सप्तकोशी बाढी मानबबस्तीमा, सयौँ परिवार प्रभावित, जनजीवन अस्तव्यस्त

National News News

The Mirror

सप्तकोशी नदीले उदयपुर जिल्लामा आफ्नो धार परिवर्तन गरेपछि बाढी र डुबानबाट जोगाउन सयौँ मानिसलाई उद्धार गरिएको र त्यो क्रम अझै जारी रहेको अधिकारीहरूले बताएका छन्।

उदयपुर जिल्लाका प्रमुख जिल्ला अधिकारी वीरेन्द्रकुमार यादवका अनुसार बेलका नगरपालिकाको डुम्रेनजिकै सप्तकोशी फुटेर मङ्गलवार राति नदीको प्रवाह परिवर्तन भएको थियो।

त्यसबाट मानवबस्तीमा पानी पस्न थालेपछि नेपाल प्रहरी र सशस्त्र प्रहरीको टोलीले उद्धार कार्य अघि बढाएको उनले जानकारी दिए।

सुनसरी र सप्तरी जिल्लामा सप्तकोशी नदीमा तटबन्ध गरिएको भए पनि उदयपुरमा त्यस्तो संरचना छैन।

उद्धारकार्यमा डुङ्गासहित ३०० सुरक्षाकर्मी परिचालित भएका छन्। अहिलेसम्म कुनै क्षतिको विवरण नआएको अधिकारीहरूले बताएका छन्।

सिसौली टप्पु-चिलिया बस्ती हुँदै पसेको कोशीको भँगालोले वडा नं ८, ९, १, २ र ३ का बासिन्दा प्रभावित भएको प्रमुख जिल्ला अधिकारी यादवले बताए।

बुधवार बिहान ११ बजेसम्म डुबान र कटानबाट प्रभावित करिब ९०० परिवारका मानिसको उद्धार गरी सुरक्षित स्थानमा पुर्‍याइएको जानकारी उनले दिए।

गाउँमा कोशी छिरेपछि कस्तो छ अवस्था?

उक्त स्थानमा जोखिम पहिचान गरी नदीलाई फुट्न नदिने प्रयास एक महिनादेखि जारी राखिएको बेलका नगरपालिकाका मेयर अशोक कार्कीले बताए।

उनी भन्छन्, “पहिला बेलका नागरपालिका वडा नम्बर ८ लाहुरे खोँच भन्ने ठाउँबाट कोशी पश्चिम बग्ने गरेको थियो। २०४५ सालको भूकम्पपछि त्यो नदीको किनार पूर्व गएको हो।”

“आज बिहान पौने तीनदेखि चार बजेको बीचमा फुटेर कोशीको धेरै ठूलो भँगालो पहिला नदी बग्ने गरेको बाटोमै बगिरहेको छ। अब त्यो ठूलो बस्ती बसेको ठाउँमा नै पसिरहेको छ।”

उनले उक्त कटानबाट उदयपुरतर्फको बेलका नगरपालिकाका पाँचवटा वडा र सुनसरीको वराह नगरपालिकाकाका दुईवटा वडाका करिब २०,००० मानिस प्रभावित हुने अवस्था रहेको बताए।

बेलकाका नगरप्रमुख कार्कीले त्यस क्षेत्रमा झन्डै २,३०० परिवारको बसोबास रहेको र तीमध्ये करिब ४०० परिवार यसअघि नै सुरक्षित स्थानमा गएको बताए।

बाँकी रहेकाहरूलाई बुधवार बिहानैबाट स्थानीय प्रशासन र सुरक्षा निकायको सहयोगमा सुरक्षित स्थानमा लैजाने काम भइरहेको छ।

उनले भने, “अहिले वर्षा नभएको र घाम लागेकोले हामीले त्यहाँका बासिन्दाहरूलाई सुरक्षित स्थानमा सार्न केही सहज महसुस गरेका छौँ। दिनभरिमा सबैलाई सुरक्षित स्थानमा सारिसक्छौँ होला।”

उनका अनुसार कोशी नदीको प्रवाह अब पश्चिमतर्फ फर्किने अवस्था आएकाले त्यहाँ मानिसहरूलाई राख्न सकिँदैन।

नदीले बहाव फेर्नु सामान्य

जलस्रोत मामिलामा लामो समय कलम चलाएका पत्रकार राजेन्द्र दाहाल ठूला वा साना नदीले आफ्नो बहाव परिवर्तन गर्नु नौलो कुरा नभएको बताउँछन्।

दाहालले भने, “१२ वर्षमा खोलो फर्कन्छ भन्ने कहावत गाउँघरमा हिजोका पुस्तालाई पनि थाहा छ र आजका पुस्तालाई पनि थाहा छ। यताबाट उता जानु र उताबाट यता आउनु नदीको सामान्य स्वभाव हो।”

“आर्थिक, सामाजिक र राजनीतिक स्वार्थ गाँसिएका कारणले हामी मानिसलाई त्यस्तो घटनाबाट अप्ठेरो लाग्छ, ठूलो क्षति पुग्छ। तर नदीको प्रकृतिलाई हेर्दा यस्ता कुरा स्वाभाविक हुन्।”

[ref-bbc]

अन्तमा यो पनि…

Leave a Reply

Your email address will not be published. Required fields are marked *